Аймаг дүүрэг бүрийн хүүхэд, залуучууд вэб сайттай боллоо.

    Хүүхэд, залуучуудын оролцоог дэмжих “Хөгжлийн Түүчээ” сан нь “хүн бүрийн сэтгэл хангалуун амьдралын төлөө” алсын хараанд чиглэсэн 0:9 хөтөлбөр хэрэгжүүлдэг билээ. Тус хөтөлбөрийн нэг болох Мэдээллийн 0:9 хөтөлбөрийн 2010 онд аймаг, дүүрэг бүрийг вэб сайттай болгох зорилт тавин ажиллаж байна.
    Энэ зорилтын хүрээнд HICP ХХКомпани 21 аймаг 9 дүүргийн вэб сайтыг хийж өгөхөөр хамтын ажиллагааны гэрээ байгууллаа.
Тус вэб хуудсыг зуны туршид хийж 9 сард залуучууддаа өргөн барих бөгөөд вэб хуудаст орж үзэхийн тулд өөрийн орон нутгийн нэрийг бичээд www.аймаг/дүүргийн нэр.info гэж бичихэд л хангалттай юм. Жишээ нь: www.bayangol.info, www.bulgan.info, www.mongolias.info  
    Энэ вэб сайтыг HICP ХХК нь үнэ төлбөргүйгээр хийж, хүүхэд, залуучууддаа өргөн барьж байгаа бөгөөд бүх вэб сайтын аюулгүй ажиллагааг хангах, хөгжүүлэгч /админ/-дийг сургаж бэлтгэх, гарын авлага бэлтгэх зэрэг ажлыг хариуцан хийх бол Хөгжлийн Түүчээ сангаас дээрх вэб сайтыг хөгжүүлэх, байнгын мэдээ, мэдээллээр хангах ажлыг хариуцах юм.
    
Хүүхэд, залуучуудыг дэмжигч HICP ХХК нь  “Интернэт дэх Монгол агуулгыг хөгжүүлнэ” гэсэн уриатайгаар, Програм хангамж болон интернэтэд суурилсан вэб аппликэйшн боловсруулах, веб дизайн, мултимедиа програмчлал, интернэт маркетинг, веб хостинг болон домэйн нэр олгох, мэдээллийн технологийн зөвлөгөө өгөх үндсэн чиглэлтэйгээр үйл ажиллагаагаа амжилттай явуулж байгаа шинэ залуу компани юм.
    Ингээд мэдээллийн эрин зуунд амьдарч байгаа хүүхэд, залуучууддаа бодитой маш том хөрөнгө оруулалт хийж байгаа HICP ХХК-ндаа талархсанаа илэрхийлье.